رئيس التحرير
عصام عثمان
 
ads

اليوم ذكرى وفاة الباكى الضاحك

الأربعاء 28/فبراير/2018 - 09:23 ص
اليوم ذكرى وفاة الباكى
اليوم ذكرى وفاة الباكى الضاحك
ايمان بشير
تحل اليوم ذكرى وفاة الباكى الضاحك او فيلسوف الضحك وهو لقب الفنان الكوميدي الراحل محمد عوض ( مكتوب على النت ان لقبه قارئ الفنجان لشهرته على قراءة الفنجان وهذا خطأ تماما )
محمد عوض بعتبره احد أعلام الكوميديا المصرية بتلقائيته البسيطة واللى حتى الان بالرغم رحيله فى تاريخ 27 فبراير 1997) اى من 21 سنة مزال محتفظ بمكانة كبيرة في قلوب محبيه من الجمهور مين ممكن ينسى أنا عاطف الأشموني مؤلف الجنة البائسة فى مسرحية جولفدان هانم عام 1962 واللى كانت بداية شهرته مع فرقة مسرح التليفزيون مين ينسى محسن فى فيلم اخواته البنات سنة 1976 ( وهو لقب اطلق عليه فعلا اخو البنات )وعزيز محمد حمزة فى البحث عن فضيحة مع عادل امام اللى جاب عيلة عيلته (طنط وجوز طنط من طنطا)علشان يخطب واحده وكان طالب طلبات غير منطقية زى شقة تمليك سبع اوض ويتفرشو وياريت يكون معاها بنت وولد بنت شغالة وولد سفرجي
وهدفعلك مهر مييييييية جنيه يالهوى محمد عوض كان مسخرة بجد
محمد عوض عمل حوالى ميت فيلم مع كبار المخرجين زى المخرج الكبير هنرى بركات (فيلم اخواته البنات )
وفيلم السيرك سنة 1968 مع عاطف سالم وفيلم اكاذيب حواء مع فطين عبد الوهاب وفيلم مجانين بالوراثة مع نيازى مصطفى والمجرم عام 1978 مع صلاح ابو سيف فيلم شيلنى وشيلك لعلى بدرخان وفيلم اى اى اخراج سعيد مرزوق واللى برضه عمل حوالى عشرين فيلم لمجموعة افلام اطلق عليها افلام الثلاثيات مع رشدى اباظة وويوسف شعبان اخراج حسام الدين مصطفى اللى اخرج منهم لوحده حوالى خمستاشر فيلم من مجموعة الثلاثيات وحسن يوسف واحمد رمزى زى فيلم اخر شقاوة والمغامرون الثلاثة واللى شاركتهم فيه السندريلا سعاد حسنى والاصدقاء الثلاثة واللى شاركتهم البطولة نجلاء فتحى وكان اغلبهم مع حسن يوسف ويوسف فخر الدين زى فيلم اصعب جواز كل فيلم من دول حط محمد عوض بصمة فضلت مع الجمهور حتى اخر عمل ليه فى السينما فى حياة فنية قاربت الى 33 سنة ولانه عاشق للمسرح اكتر بكتير من السينما فأدواره على المسرح حوالى ميت مسرحية وهو رقم غير مسبوق فى تاريخ المسرح العربى فعمل لكبار مؤلفى المسرح فقدن لنجيب محفوظ مسرحيتان هما ثرثرة فو ق النيل القاهرة 80 مسرحية القاهرة 80 عن رواية يوم قتل الزعيم مسرحية اصل الحكاية للكاتب الكبير بكر الشرقاوى مسرحية المهزلة ( المهزلة الارضية ليوسف ادريس وظهرت فيها لاول مرة الفنانة معالى زايد واللى دوره فيها لاينسى واللى عمل مع سعيد عبد الغنى مشهد عبقرى بجد لما كان محمد عوض طالع دكتور نفسانى وبيسال المريض ( المجنون ) سعيد عبد الغنى تقدر تقولي النهارده إيه ؟؟
فيرد عليه المجنون النهارده السبت يا دكتور
الدكتور :و بكره ؟؟
المجنون: بكره السبت برضه يا دكتور
الدكتور: يعني النهارده السبت و بكره السبت ؟؟! أومال الحد يجي إمتى؟؟
المجنون: الحد يجي لما نحس إن النهارده اختلف عن امبارح
لما نحس إن الدنيا اتقدمت بينا خطوة
لما نحس عدالة النهارده تبقى أكتر من عدالة امبارح
لما نحس إن ظلم النهارده أقل بكتير من ظلم امبارح
لما نحس إننا لاقيين مكان في أتوبيس
لما نحاسب الوزير و هو لسه وزير
لما نحس إننا اتقدمنا خطوة أو اترقينا سنتي
يجي الحد يا دكتور ! الله على المشهد ده ...و
نقطة ضعف او راسب مع مرتبة الشرف تأليف لينين الرملى مسرحية حب ورشوة ودلع للكاتب الكبير يوسف عوف مسرحية سعدون تحت الطبع ل احمد عوض ..الدكتور زعتر للكاتب يسرى الجندى ...طبيب رغم انفه لمولييرسفاح رغم انفه ( جان جيتون )...مقالب اسكبان (موليار); أخلص زوج في العالم (جان انوي)
ولد محمد عوض فى حى العباسية فى 12 يونيو 1932 وكانت احد اهم امنياته انه يطلع بحار ولكن ابوه رفض ده لانه ولد وحيد على تلت بنات فقاله انه ممكن يموت فى اى وقت لحظتها مين هيكون مسؤل عنهم لو هو شغال فى البحر وعنها درس الفلسفة فى كلية الآداب جامعة عين شمس وفعلا فى سنة اولى مات الاب فأصبح محمد عوض اخو البنات فى الحقيقة وفى السينما فى الجامعة عمل مسرحيات الريحانى وقام بأداء بعض أدوار نجيب الريحاني واللى فضل حتى اخر ايامه هو مثله الاعلىوكان بيشاركه بطلات فرقة الريحانى زى مارى منيب وعقيلة راتب وميمى شكيب ونجوى سالم تحت اشراف انيس منصور استاذ الفلسفة والمشرف على المسرح الجامعى اللى تبناه فى الجامعة وبعد تخرجه فى عام 1957التحق بفرقة الريحانى باجر 12 جنيه فى الشهر واللى رشحته للفرقة مارى منيب وتبناه فى هذه الفترة العبقرى بديع خيرى وبدء يعمل ادوار صغيرة فى الفرقة ولان هو الوحيد فى الفرقة اللى كان حافظ دور البطولة لتمثيله اياها على خشبة المسرح ففى فترة مرض الفنان الكبير عادل خيرى كان محمد عوض يحل محله فورا واستمر على ذلك لمدة ثلاث سنوات فى وجود عادل خيرى يؤدى دور صغير فى مرضه يؤدى دور البطولة اثناء ذلك التحق بمعهد فنون مسرحية ليصقل موهبته بالتعليم وتلمذ على يد الفنان الكبير محمود مرسى اللى هيخرجله بعد ذلك مسرحية الخاطبة والمسرحى الكبير فتوح نشاطى بعدها انتقل الى مسرح التلفزيون وعمل معاهم مسرحية جولفدان هانم للكاتب الكبير علي أحمد باكثير كاتب فيلم واسلاماه اخراج عبد المنعم مدبولى بعدها قدم مسرحية مطرب العواطف اخراج برضه عبد المنعم مدبولى
وبعد عام 1967 حدث ارتباك فى الفن المصرى عموما وفى المسرح المصرى بصفة خاصة فقرر محمد عوض التصدى لده فاسس فرقة الكومدى المصرية على مسرح الزمالك ومعاه نبيلة عبيد وخيرية احمد ونبيل الهجرسى وابتدو بمسرحية الطرطور اخراج السيد راضى ( غيرت الرقابة اسمها الى المطب ) بعدها مسرحية العبيط ونمرة 2 يكسب أمتعنا فيها محمدعوض بتلقائيته الشديدة جدااا ثم قدم ليسرى الأبيارى ليلة القبض على حمص, ثم مسرحية هات وخد مع حسن يوسف
فى عام 1972 انضم اليه فى الفرقة فؤاد المهندس وشويكار بمجرد أنفصالهم عن فرقة الفنانين المتحدين، نتيجة خلافات المهندس، مع سمير خفاجه
وعملو مسرحية هالو دوللي ومسرحية مراتى تقريبا ويقا ل ايضا مسرحية نجمة الفاتنه ولكن للاسف لم تسجل هذه المسرحيات وجمعت بعض الافلام بهذين النجمين المحبوبين زى فيلم اجازة بالعافية وشلة محتالين
قدم محمد عوض للتليفزيون برضه مسلسلات منها البراري والحامول و بنت الحتة و أهلاً ياجدو العزيز
أصيب الفنان محمد عوض فى بداية الثمانينات بمرض السرطان ورحل الفنان الجميل محمد عوض عن عمر يناهز 65 عام وترك من الأبناء ثلاثة وهم عادل وعاطف وعلاء

إرسل لصديق

هل تتوقع وجود علاج لكورونا قبل نهاية العام

هل تتوقع وجود علاج لكورونا قبل نهاية العام
ads
ads