رئيس التحرير
عصام عثمان
 
ads
شرين هلال
شرين هلال

طريقة عمل اللجان "المشوية"

الثلاثاء 05/مايو/2020 - 12:14 ص
اللجان الإلكترونية سمعنا عنها كتير لكن منعرفش طبيعة عملها ايه ولا بتتعمل ازاي ولا حتى وظيفتها إيه.
هى أداة من أدوات الحرب الملونة الحديثة، و زى ما احنا عارفين الحرب مبقتش بس فى الميدان ولا بالجيوش النظامية. الحروب بقى ليها ادوات وبتستهدف إحتلال الوعى قبل الارض والثروات. واللجان الإلكترونية بقت اداة خطيرة فى حرب المعلومات والإشاعات.

وظيفتها الإنتشارعلى شبكة الإنترنت وخصوصا مواقع التواصل الاجتماعى ساعات يسموها الذباب الإلكتروني كنوع من التحقير لكن التسمية فيها شيء من اوصافها وطريقة عملها.

فتح عينك وودانك يا محترم للى جاي عشان الطريقة سريعة ومليانة تركات وحركات واوعى اللجان تغفلك ومتنساش تقفل مناخيرك وهنقولك ليه واحنا بنكمل الوصفة.

محتاج قبل ما نبتدى الوصفة يكون عندك جماعة او تنظيم عايز يسيطر على الرأي العام بشكل أفقى وفى وقت قياسي. وشرط من شروط المقادير: مكونات المحتوى المراد نشره تكون مفبركة ومغلوطة ويفضل استعمال مبادئ خالية من الأخلاق والمصداقية.

قادة اللجان بيتلقوا طبعا التعليمات من راس التنظيم وينزل الامر بالبث لللجان فى توقيت واحد.
بيقوموا بتكوين عدد لا محدود من الحسابات الوهمية اللى بتوصل للآلاف فى بعض الأحيان و شغلة اللجان دى بتبقى مدفوعة الأجر وبتتحاسب بالبوست او التغريدة وكمان بتتقاول على عدد الجمهور المراد الوصول اليه.

وحساب اللجنة تعرفه من هيئة مبهمة موحدة محصلوش وش رغيف العيش ابو بخمسة صاغ لإن حسابات اللجان بشكل عام بتكون كلها شكل واحد: مفيهاش اسم محدد وبلوجو موحد وكمان معندهاش "بايو" او تعريف وضيف كمان، ميكونش فى صورة للحساب، انما رغيف العيش مفيش وش رغيف شبه اخوه.
كمانالحساب عادة بيكون جديد نوفى يطلع ساعة الهجوم ويختفى فترات لحد ما يجي له نفير عام جديد من قائد اللجنة. يمأمأ بالرسالة او الإشاعة المطلوب نشرها فورا ويرجع يختفى فى الشقوق من تانى.

ولو حاولت تعلق عنده او تجره لمحادثة مش هيرد عليك لإنه معندوش تعليمات بالتعامل. التعليمات بتيجى له واضحة ومحددة ومش من ضمنها الأخد والعطا. هو يدخل يبخ السم ويجرى يستخبى.

عمرك ما تلاقى لحساب اللجنة صورة شخصية تدل على هوية لكن عشان يغفلك ويحسسك بالوطنية يحط علم مصر مثلا او راية دينية اهو اي حاجة يستر بيها لجنته.

واكيد مش هتلاقى معلومات مثلا عن حياته او تفاصيل عن شغله ولا حتى تعليمه. لكن الثابت انه بيذكر مكان اقامته مصر ودا من باب التضليل لإن بالبحث إتضح إن معظم الحسابات بتدار من الخارج.

يظهر اللجنة وينفش ويترعرع لما يكون فى هاشتاج واخد التريند فجأة. هتلاقى عدد حسابات اللجان اللى بتكتب فى الهاشتاج اكتر من عدد الناس اللى بتكره مصلحة الضرايب على الكوكب.

فلما تفتح الفرن قصدى الهاشتاج وتتفرج على كم الحسابات المجهولة اللى بتكتب في الموضوع: رسالة موحدة ومتطابقة فى الكلمة والحرف والفصلة والنقطة حتى الإيموجى تعرف ان الطبخة استوت قصدى التعليمات وصلت واللجان انتشرت وعملت المطلوب. وبيتم إستدراج الجموع للكتابة فى الهاشتاج سواء من المؤيدين او المعارضين لخلق حالة من الصراع و تفتيت الرأي العام وبكدة يفضل الهاشتاج تريند بفعل زيادة تداوله بين الجميع.

ومع تطورعمل اللجان ونجاحها النوعى فى ثورات الجحيم العربي وما بعدها من كوارث أصبحت مؤهلة لمزيدا من الإضافات والألوان الصناعية فتدعى انتمائها مثلا لمؤسسات بعينها زى الجيش والشرطة او إنهم اصحاب مناصب رفيعة فى الوزارات المختلفة على حسب الإحتياج او طبيعة الإشاعة. دول كمان مبقوش بس ظاهرين فى الصفحات اللى بتهاجم الدولة المصرية لأ، كمان قرروا يوسعوا نشاطهم وبقو متواجدين فى صفحات الطبخ والمشاعر وكمان الصفحات الكوميدية وطبعا منسيوش الصفحات الرياضية عشان الريجيم.

مش دول بس أشكال اللجان المتعارف عليها، مؤخرا تم إكتشاف نوع جديد من انواع اللجان من خلال تجنيد فرد او اكثر من اصحاب الحسابات الكبيرة زى البلوجرز المشهورين او الإعلاميين اللى بتتعدى حساباتهم مئات الآلاف من المتابعين. طبعا بوست واحد من الحسابات دى بينتشر بسرعة البرق وممكن يحقق عمل اللجان بضغطة واحدة بس وبيدفع لهم مبالغ او هم اصلا اعضاء فى الجماعة او التنظيم او بيكونو تحت تهديد ما.

التنظيم او الجماعة عندهم إنكار منقطع النظير لملكية اللجان الإكترونية ومستحيل يعترفو بيها لإنهم دايما بيعايرو خصومهم بإمتلاكها. لكن فاحت ريحة الدهون واتعرفت الطبخة بإعتراف احد أعضاء التنظيم وإسمه صابر مشهوروكان بيتاجر بلحم "ترتر الشريف" (نعتذر عن بشاعة الإسم بس دا اكتر إسم محترم له حاليا) اللى وقع فى فخ طال سمعته وسمعة التنظيم وحاول صابر ينطحعشان يكسب بنط عند باقى القطيع ويحتل ارضية زميله عند التنظيمفوقع بلسانه واعترف بإمتلاك التنظيم للجان الإلكترونية وقال بالفم المليان "اللجان الإلكترونية بتاعة الاخوان المسلمين".

سقطة طبيعى تحصل لما تعمل تنظيم قائم على النقل وليس الفكر، لما يكون أتباعك صم بكى عمى لا يفقهون إلا الطاعة بلا عقل لازم يوقعوك. وفين الإستغراب احنا إتفقنا ان اللجان لا تشترط القيم الأخلاقية في اللى بتنشره فكان أمر مقبول إنهم يتاجرو ببعضهم عشان يكسبو شهرة او ينقذو سمعة التنظيم.

كدة بنكون جهزنا جزء كبير من وصفة اللجان لكن عشان لحمتها ضانى كان لازم نقولك سد مناخيرك قبل الشوى. كنا مضطرين ندبح ونسلخ ونشفى عشان احلى طعم للضانى بيكون وهو مشوى.اتمنى تجربو الوصفة بنفسكم هما يستحقو الفحم والأسياخ وانتو تستحقو متعة مذاق "الشوى".

إرسل لصديق

هل توافق على اخذ لقاح كورونا

هل توافق على اخذ لقاح كورونا
ads
ads