الصابرين يااحمد بخير

الجملة دى بتقولها أمى

نهار وليل
‏*****

الصابرين يا احمد بخير

فإياك يا ولدى تمل من الايام

يشيخ جذعك يميل

ده الصبر ياابنى شىء جميل

والصابرين يا احمد بخير
‏‏‎******‎

اصبر
اصبر وخليك ك الوتد
خليك أسد
مهما يكون حملك تقيل

الرزق إيه يااحمد يا ولدى
غير إنه جالك بعد هدت حيل

ونهارك إيه غير إنه جالك بعد عتمة وليل

الصابرين يااحمد بخير
‏‎*****‎

خليك صبور
واستنى دورك فى الطابور

ده اللى بيتمسك بحلمه
ويدوس على خوفه وألمه
بيشوف ف وسط الضلمه نور

ويقولوا عنه الناس بطل
ويقولوا عنه إنه جسووور

خليك صبور

والصابرين يااحمد بخير
‏‎*****‎

عارف ياولدى
الصبر أجمل مايكون

واللى بيصبر ع البلا
بيكافئه رب الكون

أوماااال يا ولدى
ربك حنوووون

والصابرين يااحمد بخير